1. Waxaan ku dhaartay Buurta 'Siinaay' [1].

2. Iyo Kitaab qoran [2].

3. Ku qoran xaashiyo (maqaar ido khafiif ah) fidsan oo furan.

4. Iyo Guriga (Kacbada) la siyaarto [3].

5. Iyo saqafka la kor yeelay (samada).

6. Iyo badda lagu huriyey 'dabka ama soo fatahda' [4].

7. Hubaal, cadaabka Rabbigaa waa wax dhici oo sugan -

8. Ma jiro wax celin.

9. Maalinta markuu cirku hadba dhinac u wareegi,

10. Buuruhuna socon socosho (yaab) leh [5].

11. Hoog waxaa leh Maalinkaas kuwa (Xaqa) beeniya (ee nabad diidka ah).

12. Kuwa iska cayaara ee dhex gala xumaanta.

13. Maalinka loogu tuuri Naarta Jahannama si daran oo xoog leh (waxaa lagu dhihi):

14. Waa tan Naartii aad beenin jirteen.

15. Ma sixir baa (cadaabkani), mise wax ma aragtaan?

16. Gala, markaa ku samra ama ha ku samrina - waa isugu kiin mid, Waxaa uun laydinka goyn waxaad fali jirteen (oo xumaan ah).

17. Kuwa ka dhowrsada xumaha [6] waxay dhex ahaan beero iyo barwaaqo (Janno).

18. Iyagoo ku raaxeysan wuxuu siiyey Rabbigood, Wuxuuna ka badbaadshay Rabbigood cadaabka Naarta ololka badan.

19. (Waxaa lagu odhan): Cuna oo cabba si bogaadin leh. Waa abaalka waxaad fali jirteen (oo wanaag ah).

20. Waxay ku dangiigsan sariiro heer sare ahoo la safay. Waxaanna u guurin dumar leh indho waasic ahoo (qurux badan).

21. Kuwa (Xaqa) rumeeyey oo ay durriyadoodu ku raacdo Iimaanka - waxaanu isu wada keeni iyaga iyo durriyadooda, waxnana kama nusqaaminayno camalkooda. Qof walbaa wuxuu mudan (curaar u yahay) camalkiisa.

22. Waxaannu siin midho iyo hilib waxay rabaan.

23. Waxay isu dhiib-dhiibi galaas (khamro xalaal) ah aan lahayn wax ah laqwi iyo dambaabid.

24. Waxaa u adeegi wiilal yar yar ay leeyihiin, la moodo luul la dhowray.

25. Qaarkood (ehlu Jannaha) waxay qaabili qaar kale iyagoo is-wareysan.

26. Waxay odhan: Waxaan ka hor 'intaan adduunka joognay' ahayn kuwo ehelkayaga dhexdooda ka cabsada (cadaabka Alle).

27. Markaasuu Alle nagu manneystay (denbi dhaaf) oo naga dhowray cadaabka hanfiga kulul.

28. Waxaan ahayn horey kuwa barya Alle (Keliya).Waa Isaga xaqiiq Baarriga, Naxariista Badan.

29. Ee waani (Nabi Muxammadow), Waayo adigu ma tihid waa igu Nicmadda Rabbigaa, faallalow iyo jinnoole midna.

30. Mise waxay leeyihiin waa gabyaa, aan la sugno musiibo waqtiga la iman [7].

31. Dheh: Suga (geeridayda)! Aniguna waxaan sugi (waxa idinku dhaca).

32. Ma caqliyadooda (xun) baa ku amra sidaa (inay kaa been sheegaan Nabiyow), ma aha ee waa qolo xadgudub badan.

33. Mise waxay leeyihiin: Waa been abuurtay (Qur’aanka)? Mayee! Ma rumeysna (Xaqa).

34. Ee ha keenaan hadal la mid ahi (Qur’aankani) hadday run sheegayaan.

35. Mise waxaa la abuuray abuure la'aan, mise iyagaa abuuray nafahooda?.

36. Mise waxay abuureen samooyinka iyo arlada? Mayee, ma yaqiinsana.

37. Mise waxay hayaan khasnadaha Rabbigaa? Mise waxaa la siiyey awood dhan (mayee waa kuwo tabar daran, liita)?

38. Mise waxay leeyihiin sallaanno ay ku dhegaystaan (Ghaybka iyo warka samada); ee ha keeno dhegaystahoodu xujo cad.

39. Mise wuxuu (Alle) leeyahay gabdho idinkuna leedihiin wiilal?

40. Mise waxaad weydiisataa ujro, sidaa awgeed deyn la culaabeysan yihiin?

41. Mise waxay og yihiin waxa qarsoon aan muuqan oo ay qoraan?.

42. Mise waxay kula maaggan yihin dabin, kuwase gaalooba waa iyaga kuwa ku jaba dabinkooda.

43. Mise waxay leeyihiin ilaah aan ahayn Alle? Alle waa ka hufan yahay waxay la wadaajiyaan (cibaadada).

44. Hadday arkaan gabal cirka ka mid ah oo soo dhacaya [8] waxay odhan: Waa daruuro is dul saaran (cinaad darti).

45. Ee iskaga tag intay la kulmaan Maalinkooda ay la suuxi (qarracan).

46. Maalinka uusan dabinkoodu waxba u tareyn oo aan loo gargaareyn.

47. Waxay xaqiiq kuwa fala dulmiga (shirkiga iyo xumaha kale) la kulmi cadaab taa ka sokow 'adduunka gudahi' [9] badankooduse ma ay oga.

48. Ee ku samir (Nabiyow) xukunka Rabbigaa, waxaad tahay indhahayaga hortood, oo ku tasbiixso Ammaanaha Rabbigaa markaad soo kacdo.

49. Habeenka qaarkiisna tuko, iyo markay xiddiguhu dhacaan (oogga hore).